Wasaaradda Waxbarashada iyo Tacliinta Sare ayaa tababbar iyo wacyigelin gaaban u qabatay macallimiinta aaladda “Learning Passport” oo ah hannaan cusub oo u fududaynaya ardaydu in ay casharrada ay Wasaaradda Waxbarashada & Tacliinta Sare ee dawladda Puntland duubtay (iyo kuwa ay duubi doonto dhawaan) ee dugsiyada hoose, dhexe iyo sare ay ka daawadaan moobillada iyo kambuyuutarrada.
Tababbarkan ayaa waxaa ka soo qayb galay maanta Wasiirka Wasaaradda Waxbarashada iyo Tacliinta Sare, Agaasimaha Guud, Iyo Agaasime-waaxeeddada kala duwan ee Wasaaradda Waxbarashada.
Adeeggaan oo ONLINE ah, waxa qura oo ardaydu u baahan yihiin, si ay casharradaan ula socdaan, waa in ay Google Play Store-ka kalasoo dagaan app-ka CILMI ama ay booqdaan websaydka Puntland Learning Passport.
Tababbar gaaban oo kor loogu qaadayo kobcinta garaadka aqooneed iyo kan siyaasadeed heerka Wasaaradda Waxbarashada iyo Tacliinta sare.
Barnaamijkaan duubista casharrada online ah ayaa ka duwan kii hore, maaddaama casharradu ka badan yihiin bishii May iyo Juun.
Waxaa kaloo lagu soo siyaadiyey agabka duubista ah oo ka duwan muuqalkii hore.
Wasaaradda Waxbarashada & Tacliinta Sare ee dawladda Puntland waxa ay uga mahadnaqaysaa hay’adda UNICEF, shirkadda Microsoft iyo Jaamacadda Cambridge gacanta deeqsinnimo ee ay ka siiyeen hirgelinta adeeggaan oo wax weyn ka tari doona daboolista baahida waxbarasho ee ubadka iyo da’ yarta ku nool guud ahaan Puntland.
Sidoo kale, Wasaaraddu waxay ku rajo weyn tahay in adeeggaan uu si gaar ah u caawin doono dhallaanka ku nool xeryaha barakacayaasha iyo ilmo kasta oo laga yaabo in duruufo dhaqan-dhaqaale ka hor istaageen inuu helo waxbarasho.
“Jiil aqoon lagu barbaarshaa, bulshadu saboolnimo kaga baxdaa”.
