08/08/2016-Wasaaradda Waxbarashada iyo Tacliinta-sare ee Puntland aya ganaaxday in kala noqotey Aqoonsigii xarunnimada tuulada Qarxis ee hoos-tagta Degmada Eyl ee Gobolka Nugaal , Si la mid ahna Wasaaraddu baabi,isay natiijadii imtixaanka dugsiga hoose/dhexe ee tuulada Qarxis.
Go,aankan oo noqonaya mid saameynaya sumcadda waxbarasho ee tuulada Qarxis Gobolka Nugaal, ayaa ka danbeeyey ka dib markii dhawaan lagu jabsaday Qarxis imtixaankii fasalka 8aad ee sanad dugsiyeedka 2016, Islamarkaana sababtey dhacdadaasi in wasaaraddu qaado talaabo dib loogu bedelayo guud ahaan imtixaankii fasalka 8aad ee Deegaanada Puntland.
Sidoo kale waxay wasaaraddu baabi’say natiijadii imtixaanka 6 arday oo dhigta dugsiga hoose dhexe Tayo ee degmada Badhan, kuwaas oo masuuliyiinta wasaaraddu sheegeen inay ku caddaatay in ay ka boodeen 2 sanad dugsiyeed.
Akhriso Go,aanka Wasaaradda ee Tuulada Qarxis
Go’aanno
Haddaba, Wasaaradda waxbarashadu iyadoo ka ambaqaadaya, hagaajinta iyo hufnaanta xirfadda Imtixaanka, iyagoo ilaalinaya mustaqbalka iyo sumcadda imtixaanaadka, iyagoo dhiirigelinaya in ardayda Puntland helaan fursad isku mid ah si ay u helaan tartan isku mid ah ayaa waxay gaadhay go’aamadan soo socda;
- Wasaaraddu waxay baabi’say natiijadii Imtixaanka dugsiga hoose/dhexe ee Qarxis ee degmada Eyl.
- Wasaaraddu waxay aqoonsigii xarunnimada imtixaan kala noqotay tuulada Qarxis waxaana ardaydooda loo rarayaa xarumaha imtixaan ee ugu dhaw.
- Sidoo kale waxay wasaaraddu baabi’say natiijadii imtixaanka 6 arday oo dhigta dugsiga hoose dhexe Tayo ee degmada Badhan, kuwaas oo ay ku caddaatay in ay ka boodeen 2 sano dugsiyeed.
- Wasaaraddu waxay ku boorrinaysaa dhammaan bulsho waynta Soomaaliyeed in ay ka qayb qaataan sugidda ammaanka imtixaanaadka ayna ogaadaan in haddii uusan imtixaan jirin aan waxbarasho jirin.