12/jan/2015, Wasiirka Wasaarada Waxbarashada iyo Tacliinta sare ee Puntland Dr Cali Xaaji Warsame ayaa maanta tababar soconaya mudo labo sano ah xarunta tababarka macalimiinta ee GTEC Garoowe uga furay macalimiin laga kala keenay qaar kamid ah gobolada Puntland.
Tababarkaan oo ay ka faa’iidaysan doonaan mudada uusocdo 33 gabdhood oo barayaal ka ah qaar kamid ah dugsiyada hoose iyo dhexe ee gobolada Bari, Gardafuu, Nugaal iyo Mudug ayaa waxaa munaasabadii lagu furayey ka qaybgalay Wasiirka wasaarada waxbarashada iyo tacliinta sare agaasimaha guud ee wasaarada, madax kasocotey Hay’ada Relief oo kulliyada kataageeraysa tababarkaan, Maamulaha kulliyada GTEC iyo ardaydii tababarka loofuray.
Maamulaha kulliyada tababarka macalimiinta Puntland ee GTEC Mudane Cabdiraxmaan Sheekhdoon ayaa ugu horayntii faahfaahin ka bixyey barnaamijkaan iyo cida ka faa’iidaysan doonta mudada uu socdo, wuxuuna sheegay in kulliyadu ay u taagantahay soo saarista macalimiin tayo leh oo lagu dhisayo tacliinta dalka oo dhan.
Wasiirka Wasaarada Waxbarashada iyo Tacliinta sare ee Puntland Dr Cali Xaaji Warsame oo rasmi u furay tababarkaan ayaa sheegay in wasaaradu door muhiima siiso gabdhaha ayna wado sidii dugsiyada hoose iyo dhexe ay ugu badan lahaayeen macalimiinta barayaasha ah maadaama ay yihiin meesha dhalaanka lagu soo barbaariyo gabadhuna ay tahay mida ubadka soo saarta, sidoo kalena ay gabdhuhu kusoo hiranayaan meesha ay joogaan barayaasha dumarka.
Dhinaca kalena wasiirka ayaa ku booriyey macalimiinta tababarkaan loofuray inay ka faa’iidaystaan waxbarashadaan lasiiyey ayna usoo gudbiyaan aqoontooda bulshada kale gaar ahaan dugsiyada ay tababarkaan u qaadanayaan.
Qaar kamid ah macalimiinta ka faa’iidaysanaysa tababarkaan mudada uu socda ayaa sheegay inay ku faraxsan yihiin tababarka loofuray waxayna balan qaadeen inay kadhabayn doonaan fursada lasiiyey, waxaana y u mahadceliyeen Hay’ada Relief, kulliyada GTEC iyo wasaarada waxbarashada iyo Tacliinta sare.
Waa dufcadii labaad oo gabdhaha ayna sanadkaan tababar noocaan ah u furto kulliyada tababarka macalimiinta ee GTEC, oo ka duulaysa siyaasada wasaarada ee ah kordhinta macalimiinta dumarka ah ee Puntland.
Kuliyadda Tababarka Macaliminta GTEC ayaa kor u socota iyadoo ku xaraysan yihiin boqolaal Macalamiin ah oo Goboladda Puntland ka kala yimi.
Halkaan Ka Daawo Sawirro.
XAFIISKA WARFAAFINTA WASAARADDA WAXBARASHADA IYO TACLIINTA SARE DOWLADDA PUNTLAND
Deeq Maxamed Warsame ‘’ Hurevov’’ Garowe, Puntland Somalia.