23/10/2015-Wasaradda waxbarashada iyo tacliinta sare dowlada Puntland ayaa magalada Garowe ku qaabishay masuuliyiin ka socda wasaradda waxbarashada Dalka Kuwait iyo Hay’adda Bisha Cas kuwaasoo booqday Dugsiga sare ee Gambool.
Wasiirka waxbarashada Puntland Abshir Aw-Ciise Aw-Yuusuf iyo ku xigeenkiisa Dr.Maxamed Cali Faarax ayaa wafdigan ku qaabilay xafiiska wasarada waxbarashada, waxayna ka wada hadleen arrimo salka ku hayo horumarinta waxbarashada iyo kor u qaadista tayada macalimiinta.
Arrimaha ay labada dhinac isla soo qaadeen waxaa ka mid ahaa horumarinta waxbarashada,sida tababarida macalimiinta, dhismaha Iskuulada, Tababarida shaqaalaha, is-dhaafsiga xogaha la xariira dhanka waxbarashada, sidoo kale masuuliyiinta Kuwait ayaa sheegay inay taageeri doonaan wasaradda sida horumarka hadda la gaaray mid kasii saraysa loo gaaro.
Wasiir Abshir ayaa sheegay inuu ku faraxsan yahay booqashada masuuliyiintan ku yimaadeen Garowe, waxa kale uu sheegay inay wada shaqaynta labada dhinac u dhaxaysa dhankooda sii xoojin doonaa.
Wafdiga ayaa markey booqdeen Iskuulka sare ee Gambool Garowe kala kulmay soo dhaweyn diirran, mamulka Iskuulka ayaa war bixin ka siiyay wafdiga xaalada iskuulka iyo sidey wax u kala socdaan.
Hoos Ka Daawo Sawiradda
By Deeq Maxamed Warsame.