20/May/2015- Inka badan boqol macalin ayaa ka qalin jabiyay Kulliyadda Tababarka macalimiinta Puntland ee GTEC taasoo ku taala magalada Garowe.
Munaasibad macalimiinta qalin jabisay lagu gudoon siinayay ayaa galabta lagu qabtay Jaamacadda, waxana kasoo qayb galay Wasiirka waxbarashada Puntland Mudane Cali Xaaji Warsame, ku xigeenkiisa Dr.Maxamed Cali Faarax, Xildhibaano, waalidiin iyo masuuliyiin kale.
Mamulaha Kulliyaddan GTEC Cabdiraxmaan Shiikh Cali ayaa sheegay xafladan in loo qabtay 119-arday, kuwaasoo isagu jira labad qaybood ee macalinka loo tababaro , macalimiinta shaqayeeya ee tababarka qaatay ayuu tiradooda ku sheegay Cabdiraxmaan inay dhan yihiin 58-arday sodan ka mid ah waa macalimiin dugsi sare 28-na waa macalimiin wax ka dhiga dugsiyadda hoose dhexe.
Xildhibaan Siciid Cabdi Samatar Surcad oo ka mid ahaa Xildhibaanaddii kulankan lagu caasumay ayaa boggaadiyay tiradda macalimiinta maanta qalin-jabisay, waxa kale uu sheegay inay muhiim tahay waxa lagu tababarayay inay si hufan u gaarsiiyaan ubadka ku nool Puntland.
Qaar ka mid ah waalidiinta xaflada lagu caasumay iyo macalimiinta qalin-jabiyay ayaa darreenkooda ka hadlay, waxayna sheegeen inay aad ugu faraxsan yihiin waxa meesha ka dhacaya, iyadoona wasaradda waxabarashada ugu baaqay waalidiinta in shaqooyin loo raadiyo macalimiinta tababarka soo qaatay.
Wasiirka waxbarashada iyo tacliinta sare mudane Cali Xaaji Warsame ayaa sheegay ka wasarad ahaan inay ku faraxsan yihiin macalimiinta tababarka kusoo qaatay GTEC, kuwaasoo qaab lacag la’aan ah ku dhiganayay mudada uu socday tababarka.
Cali Xaaji Warsame ayaa muujiyay Kulliyadda GTEC inay ula mid tahay Jaamacadda GAHAYR, wuxuna ardayda qalin jabisay ugu hambaleeyay guulaha ay ka gaareen tababarka intuu u socday.
Kuliyadda GTEC ayaa la asasay sanadkii 2005, waxana mudadaas ka qalin jabiyay in ka badan kun iyo afar boqol oo macalin, kuwaasoo intooda badan dalka ka shaqeeya.
Hoos Ka Daawo Sawiradda
Xafiiska Warfaafinta Wasaaradda Waxbarashada iyo Tacliinta Sare ee Dowlada puntland.